China-in enthlatua puh kum 11 tang turin a hrem

China-a court chuan nimin khan Canadian sumdawng, Michael Spavor chu an ram enthlatuah puhin thiam loh an chantir a, kum 11 chhung lungin tang turin a hrem. He thuthlukna vang hian China leh Canada inkara boruak ṭha lo sa chu a belhchhah ngei rin a ni.

Spavor hian kum rei tak chu China leh North Korea ram inkarah travel and cultural exhange business a lo kalpui tawh a ni. Kum 2018-a US ngenna anga Canada sorkarin Chinese telecom company lian, Huawai chief financial officer Meng Wanzhou an man hnu lawkah khan China chuan Spavor leh Canada mi pakhat dang, Michael Kovrig chu a man ve nghal a ni. Canada sorkar chuan Weng man anih avangin thungrulh nan Spavor-te hi China chuan a man niin a sawi a, mahse hei hi China chuan a pha thung.

March thla khan court chuan Spavor chungthu hi darkar hnih chuang an lo ngaihtuah tawh a, hmun danga dah sawn anih tur thu sawi mah se an sawnna hmun tur erawh an sawilang lo thunga, a mimal thil ṭhenkhatte pawh an mansak bawk.

Dandong city-a Intermediate People's Court chuan Spavor hi ram enthlak hna thawk a, ram thurukte midang a pek chhawn avangin thiam loh chantir a ni tih nimin khan a sawi a, kum 11 tang tura hrem a ni, a ti.

Canada prime minister Justin Trudeau chuan China rorel dan hi demin thuchhuah a siam nghal a, Michael Spavor thiam loh chantir leh hrem a nih dan chu thil dik lo, pawm theih loh a nih thu a sawi. "Kum hnih chhung chuan awmze nei loa hren anih hnuah thutlukna hi an siam a, a thubuai ngaihtuah lai pawhin langtlang taka kalpui a ni lo. He thubuai ngaihtuah a nih dan hi internation law-a tehkhawng hniam ber hmang pawhin lung a ti awi lo a ni," a ti.

Court thutlukna puan a nih hnuah China-a Canada ambassador Dominic Barton chuan Spavor hi Dandong-a a tanna hmunah a tlawh a, midangte hriat atan thuchah pathum a neih thu lo hrilhin chungte chu "Min ṭanpuina avangin ka lawm e", "Ka tha e" tih leh "Ka haw duh tawh " tihte a nih thu a sawi.

Spavor leh Kovrig te hi kum hnih leh a chanve chhung hren an nih chhung khan inbiak tawn phalsak an ni lo a. Coronavirus vangin Consular visit pawh tihtawp sak an ni a, October thla aṭang chiahin an chhunzawm thei dawn ani. An pahnih hian an chhungte emaw lawyer emaw hmuh phalsak an ni lo bawk. Hetih lai hian China-in Spavor-te pahnih a man phah chhan nia sawi, Meng-i chu Canada-a man a nih hnuah bail-a chhuah a ni tawh a, Vancouver-a a in pakhatah khawsain,a thubuaite hi court-ah ngaihtuah mek a la ni thung. August 20-ah Meng thubuai hi chinfel a ni tawh ang.