Aghanistan Army hotu lu ber thlak : Taliban-ten Kabul khawpui an hnaih tawh

Taliban-ten thuneihna pumhlum neih tuma beihpui an thlak mek karah, Afghanistan sorkar chuan an ram sipai hotu lu ber, Gernal Wali Mohammad Ahamdazai chu Nilaini khan a thlak.

General Ahmadzai hi June thla khan sipai hotu lu atan dah a ni chauh a, mahse Taliban firfiakte vanga tualchhung indona thlen mek karah thlak a ni zui leh nghal a ni. Sipai hotu lu atan hian Special Operation Corps commander, Hibatullah Alizai dah a ni.

Taliban firfiakte hian sipaite kut aṭangin khawpui an lak belh zel a, nimin zing khan province khawpui 10 an la tawh. Afghanistan khawpui, Kabul aṭanga km 150 chauha hla, Ghazni khawpui chu nimin khan firfiakte hian an lutchilh tawh bawk. Khawpui chhungah hian Taliban leh Afhgan sipaite chu la inbei reng mah se, Taliban-te hian governor office, police headquarters leh tan-in te pawh an luah tawh a, khawpui chu an thunun tawh niin Ghazni provincial council hotu Nasir Ahmad Faqiri chuan a sawi. Taliban thupuangtu pawhin social media lamah Ghazni khawpui chu an kutah a awm tawh niin a sawi bawk.

Ghazni khi Kabul-Kandahar highway-in a kaltlang niin, Kabul khawpui leh chhim lam bial inkalpawhna hmun pawimawh tak a ni. He khawpui hi firfiakte kuta a awm chuan Afghanistan airforce lam tan pawh chet a har chho tawh dawn hle a ni.

Kabul khawpui lak tumin Taliban-te hian an bei mek a, US intelligence lam chuan Taliban-te hian Kabul pawn lam an thunun ṭan tawh avangin ni 30 vel hrekin, ni 90 chhungin he khawpui hi an kut aṭangin an la thei tawh mai dawn nia a lan thu an sawi. Khawpuia cheng mi tam tak chu himna zawngin an tlanchhe mek a ni.

Ram hrang hrang pawhin Kabul-a an mi leh sa awmte himna an buaipui mek a, international airline-te pawh an staff-te lachhuak tura tih an ni tawh a ni.

US state department thupuangtu, Ned Price chuan Taliban-te chet dan chu kum 2020-a inremna an lo siam tawh kalh a ni tih sawiin, inremna an siamah hian Taliban-te chuan Afghanistan rama remna leh muanna a awm theihna tura inbiakna kalpui an remti a ni, a ti.

Inremna an siam anga Afghanistan aṭanga US sipaite lakchhuah kalpui ṭan a nih hnuah,Taliban-te hian an intiamna bawhchhiain tharum leh ralthuam hmangin thuneihna chan tumin hma an la zui ta zawk a ni. Thingtlang lam bialte an lak hnuin khawpui lam an bei chhunzawm a, nimin thleng khan province khawpui 10 chu la tawhin, Afghanistan ram 65% vel chu an thununna hnuaiah a awm tawh nia sawi a ni.