WHO in malaria leh arthritis damdawi Covid enkawlna atan zirchiang dawn

World Health Organization (WHO) chuan Covid-19 kai damdawi-ina enkawl ngai khawpa natna langchhuakte tan khawvel ram 52 -ah damdawi pathum an zirchiang dawn tih a sawi.

Independent expert panel chuan hri kai na zualte enkawlna atan artesunate, imatinib leh infliximab-te an zirchiang dawn a ni.. Artesunate hi malaria damdawi-a hman niin imatinib hi cancer ṭhenkhat enkawlna atan leh infliximab hi Crohn disease leh rheumatoid arthritis natna damdawi atan hman ṭhin a ni.

"Covid-19 dam lo enkawltur ṭha leh chak kan mamawh reng a ni, hemi kawnga hmalaknaah hian WHO chuan theihtawp chhuahin hma a hruai mek zel a ni," tiin WHO Director-General Tedros Adhanom Ghebreyesus chuan a sawi. Damdawi an zirchian turte hi a siamchhuaktute a thlawnin an pe vek bawk.

WHO chuan nikum khan Solidarity trial phase khatna an zo tawh a, khawvel ram dangte nen ṭanghoin novel coronavirus veite enkawlna tur ṭha leh rintlak hmuhchhuah tumin an bei a ni. Trial phase thar berah hian ram 52 aṭangin damdawi-in 600 leh damlo 100 chuang an tel a ni.

Remdesivir, hydroxychloroquine, lopinavir leh interferon-te chu enchhinna an kalpui zawh hnuah Covid-19 vanga damdawi-ina awm ngai chinte taksaah a hnathawh hmuh tur a tlem emaw awm lo tluk emaw nia sawi a ni.

Khawvelin hripui inthlak danglam a hmachhawn a, hri inkaichhawn awlsam tak Delta variant darh thar leh vangin zirchianna zau zawk hi neih leh tum a ni. Ram tam zawk chuan an ram mipui hnenah vaccine an pekchhuah ṭhat theih loh avangin he hri leng thar leh hi an tuar na hle.

WHO chuan Covid-19 treatment atan pahnih chiah a la sawimawi a, chungte chu interleukin-6 receptor blocker leh corticosteroids-te an ni. Nikuma United Kingdom-a zirchianna neihah chuan, steroid man tlawm leh hman tlanglawn tak, dexamethasone chuan hri kai na zual, ventilator hman ngai tawh zingah hri thihpui hi a tihniam hle tih hmuhchhuah a ni.