Israel leh Morocco-in inremna pathum ziak

Israel leh Morocco an inlaichinna siamṭhat an remtih aṭanga kum khat pawh a tlin hmain ram pahnihte thawhdunna tur inremna pathum an ziak.

Morocco ram tlawha zin, Israel foreign minister Yair Lapid leh Morocco foreign minister Nasser Bourita-te chuan Nilaini khan air service agreement an ziak a, hei bakah hian culture, sport and youth lama thawhdunna tura inremna pawh ziakin, foreign ministry pahnihte inkarah political consultation mechanism dinna turin memorandum an ziak bawk.

Thawhdunna tur inremna an ziah hnuah, nimin khan Morocco khawpui Rabat-ah Israel liasion mission hawn a ni bawk a ni.

Kum 2020, December thla khan Israel leh Morocco ramte hian US president hlui Donald Trump hmalakna hnuaiah an inlaichinna siamṭhat leh remtiin, direct flight siam pawh an remti nghal a ni.