US-in an mite hruaichhuak turin Kabul-ah sipai tir dawn

Afghanistan-a Taliban leh sipaite inbeihnain zual lam a pan zel avangin, US chuan Aghanistan khawpui, Kabul-a US embassy staff-te hruai chhuak turin sipai a tir dawn.

Kabul-ah hian sipai 3,000 tirh belh a tum tih sawiin, anni hian embasy staff-te bakah Afghan mi, US special immigrant visa (SIV) dilte an hruai chhuak dawn a, embassy erawh chu an hawn chhunzawm zel dawn tih state department thupuangtu Ned Price chuan a sawi.

Pentagon thupuangtu John Kirby chuan sipai tirhte hi Afghanistan-ah hian an awm rei dawn lo tih sawiin, an awm chhunga beih an tawk a nih erawh chuan na taka an chhan let tur thu a sawi. Sipaite hian America mite chu Kabul airport thlengin an veng dawn a ni. US hian Afghanistan-ah an palaite veng tur hia sipai hi 650 a la dah chhunzawm reng a, heng mite hi sipai tirh belh turte hian an pui ang. Kabul-a US embassy chuan Ningani khan America mi awmte chu fimkhur tur leh, Afghanisan chhuahsan turin a lo chah tawh a ni.

Britain pawhin an mi leh sate hruaichhuahna kawnga pui turin sipai 600 vel tirh a tum tih a sawi bawk a, embassy leh aid group dangte pawhin an mite an hruaichhuah mek thu an sawi.

Taliban-in Kandahar khawpui la
Taliban firfiakte hian province eng emaw zat khawpui an lak hnuah, Afghanistan rama khawpui lian ber dawttu Kandahar pawh an la leh tawh tih nimin khan official-ten an sawi.

Khawthlang lama khawpu lian Herat, chhim lam khawpui Lashkar Gah leh hmarthlang lama Qala-e-Naw khawpui pawh an kutah a awm tawh tih Taliban-te chuan an sawi bawk. Ningani khan Kabul aṭanga km 150 chauha hla, Ghazni khawpui an lo la tawh bawk a ni.

Kandahar airport chu Afghanistan sipaite kutah a la awm a, he hmun hi US-in Afghanistan-a kum 20 mission a neih chhunga a military base lian ber dawttu a ni.