WHO-in coronavirus data kimchang tarlang turin China ngen

World Health Organization (WHO) chuan China-a Wuhan khawpuia coronavirus hri hmuhchhuah hmasate data kimchang chu puangzar turin a ngen a, hri lo chhuah dan hriatchian hi hripui leng mek do hnehna tana thil pawimawh tak a nih thu a sawi.

Kum 2019 kumtawp lama Wuhan-a hri hmuhchhuah, Covid-19 vangin khawvel pumah mi maktaduai 4.3 chuang an thi tawh a ni.

WHO-a scientist team-in hri chhuah ṭan dan chhui chian tuma China ram tlawh an tum chu hun rei tak tikhawtlaisak an nih hnuah kumin January thla khan an kal thei chuah a, March thla khan an zirchianna report tichhuakin, hri lo chhuah dan chungchangah thutlukna mumal an siam thei chuang lo.

Report hi Chinese scientist-te nena an siam ho a ni a, hei vang hian a vawi hnihna atan chiang zawka zirchiang leh tura nawrna a tam hle a, China pawh virus data-te langtlang tura puangzar tura phut a ni bawk.

WHO hotu Tedros Adhanom Ghebreyesus chuan thla hmasa khan a vawi hnihna atan China-ah zirchianna thuk zawk neih leh hi rawtin, laboratory-te pawh enfiah vek a rawt. Hetih lai hian hri hi lab aṭanga put chhuak nia sawi awm chuan China a ti lungawi lo hle a, WHO-in zirchianna neih leh tura a rawt pawh mak a tih thu leh, ram dangah pawh zau zawka zirchianna hi kalpui ve turi a ti a ni.