Myanmar sipaiten medical mite an beih avangin Covid-19 hri dona kawnga hmalakna a bahlah

Insecurity Insight, Physicians for Human Rights (PHR) leh Johns Hopkins University Center for Public Health and Human Rights (CPHHR) report-in a tarlan danin, February 1-a Myanmar civil sorkar paihthlak a nih hnuah sipaiten health worker-te an vau leh beihna ṭum 252 zet a thleng a, medical mi leh sa 25 an that tawh.

Health worker-ten vau leh beih an tawh fo avangin Covid-19 hri leng do letna kawnga hmalakna pawh a bahlah phah hle niin rights group report chuan a tarlang bawk.

Sipaiten civil sorkar thuneihna an hnehchhuh hnuaah, health worker 190 chuang man an ni tawh a, hospital-te pawh ṭum 86 dap leh beih a ni tawh a, Covid-19 care centre ṭhenkhat pawh khar luih tir an ni. "Health worker ṭhenkhat chu sipai lamin manna tur thupek an tihchhuah avangin an biru a, an chhungte ṭhenkhatten man an tawk a ni," tiin report-ah hian tarlan a ni.

Sipai sorkar duh lohna lantirtu, Civil Disobedience Movement chu medical doctor tam takin an zawm avangin healthcare system pawh a nghawng hle. Sipai thuneitute chuan doctor te chu an hna zawm thuai tura hrilhin, mipuite pawh hri leng dona kawnga thuneitute thawhpui turin a sawm.

Official-a chhinchhiah danin kar liam ta chhung khan Myanmar-ah hian ni khatah hri vangin mi 300 dawn thi ziah ang an ni. Mahse damdawi lam thiamte chu hmun tam takah neih mumal an nih loh avangin hripui vanga thi hi official-a tarlan aiin a san zawk hle an rin thu an sawi.