Haiti-ah lirnghing vangin mi 300 chuang thi

Haiti khawthlang lamah kar liam ta Inrinni khan magnitude 7.2-a nain lir a nghing a, lirnghingin chhiatna a thlenah thi hi mi 304 an tling tawh a, mi dang 1,800 chuangin hliam an tuar. Building tam tak a chhe bawk.

Lirnghing inṭanna hi an ram khawpui, Port-au-Prince khawthlang lam, km 125 vela hla a ni.

Chhanchhuah hna thawktute chuan nimin thleng khan lirnghing vanga in chim hnuaia tangte chhanchhuah hna an thawh chhunzawm reng a ni. Prime minister Ariel Henry chuan lirnghing tuar nasa ber, Les Casyes khuaah chhawmdawlna hrang hrang a thawn tir nghal a, nimin khan amah pawh he khua hi a tlawh a ni.

PM Henry chuan chhiatna thleng vang hian ram pumah thla khat chhung atan state of emergency a puang nghal a, lirnghingin chhiatna a thlen dante hriatchian a ni hma chuan ram dang puihna an dil dawn rih lo tih a sawi. "Thil pawimawh hmasa ber chu in chim hnuaia tangte him taka lakchhuah phawt chu a ni," a ti. Hliam tuarte enkawlna kawngah International Red Cross leh hospital hrang hrangten theihtawpa an puih thu sawiin, an ram mipuite chu ṭangrual turin a chah nghal.