Taliban-ten Kabul tih loh khawpui pawimawh la vek tawh

Taliban firfiakte chuan Afghanistan khawpui, Kabul tih loh khawpui pawimawh dangte chu sipaite kut aṭangin an laksak vek tawh.

Khawchhak lama khawpui pawimawh, Jalalabad chu nimin khan firfiakte hian sipaite nen pawh inbei loin an la a, a hma niin hmarlama hmun pawimawh, Balkh province khawpui Mazar-i-Sharif an lo la tawh bawk. Jalalabad governor chuan inkahna a thlen hmain khawpui hi Taliban-te hnenah a surrender nghal a, hei hi civil mite nunna chhanhimna atana a ṭul thu a sawi. Hei vang hian silai hmehpuah ngai loin firfiakte hian Jalalabad khua hi an la nghal a ni.

Sorkar sipaite an chet ṭhat loh avangin president Ashraf Ghani chu bang tura nawrna a na zual hle.

Afghanistan interior ministry chuan Taliban-te hian Kabul khawpui hi luh an tum ṭan tawh niin nimin khan a sawi. Khawpui pawimawh dangte an lak vek tawh avangin, thuneihna pumhlum neih tumin Kabul hi an bitum ṭan tawh a ni. Peng hrang hrang aṭangin Kabul khawpui hi luh an tum nia sawi a ni. Hetih lai hian khawpui danga sipai leh firfiakte inbeihna avangin Kabul-ah hian mi tam tak an tlanchhe lut mek. Awmna mumal nei lo tam tak awmin, khawpui chhungah puan in te an kaih a, ei leh in lamah pawh harsatna an tawk nia sawi a ni.