Covid-19 : US-ah damdawi-ina dah luh ngai naupang an pung
US-ah hri lengin ziaawm lam a pan hnuah Delta variant vangin hri kai an pung chak thar leh hle a, naupang zingah hri kai damdawi-ina dah luh ngai pawh an pung hle.
US Department of Health and Human Services (HHS)-in Inrinni liam taa data a tihchhuahah, kum 12 hnuai lam hri kai vanga damdawi-ina enkawl mek chu 1,902 an tling tih a sawi. Hei hi coronavirus kaihhnawiha damdawi-ina enkawl mek zinga 2.4% an tling pha.
US-ah hian kum 12 hnuai lamte chuan Covid vaccine an la ve thei rih lo a, hei vang hian hri leng a hluar thar leh avangin an dinhmun pawh a derthawn phah nia sawi a ni.
Health official leh disease expert-te chuan America mite chu vaccine la ṭha turin an ngen fo a, Delta variant darh leh avangin hri kai, thihpui leh damdawi-ina dah luh ngai pawh an pung chho leh tih an sawi. Hri leng thar lehah, a bikin vaccine pek chhuah tlemna bialte chuan an tuar na zual niin an sawi. White House chief medical adviser, Dr Anthony Fauci chuan tuna hri leng leh mek chu vaccine la lote lakah a darh a ni, a ti.
US mipui, vaccine la thei chin zinga 50.5% chuan dose kimin an la tawh a, dose khatna chauh la hi 59.4% an awm bawk. Hetih lai hian mi maktaduai tel vaccine la duh lo an awm ve mek bawk.