SAfrica President Jacob Zuma a bang

16th February, 2018

South Africa-a rorellai party, African National Congress (ANC) in President Jacob Zuma chu bang tura an ngen hnuah, Nilaini khan Zuma chuan banna a thehlut ta.

Kum 75 mi, Jacob Zuma hian nikuma an party hruaitu tur thlannaah Deputy President Cyril Ramphosa a hneh zo lo a ni. Zuma a ban tak avangin Cyril Ramphosa hian acting president hna a chelh ang a, ni 30 chhungin president thar tur hi thlan a ni ang.

Jacob Zuma hi kum 2009 aṭangin South Africa president a ni a, ANC hi kum 1958 khan a zawm a ni. Party member nghet tak niin, South Africa zalenna sualtu Nelson Mandela rual khan Robben Island tan-inah kum 10 zet a lo tang tawh bawk. A chhuah hnuah pawh hun eng emaw chen ram dangah tlanchhiain, kum 1990 khan South Africa-ah a kir leh chauh a ni.

Zuma hi politician fing leh remhre tak nia sawi ni mah se, South Africa President dinhmun a chelh chhungin Zuma hian eirukna leh thuneihna hmang dik loa puhna hrang hrang a tawk fo a ni. Kum 2016, April thla khan court chuan Zuma hian ram danpui humhalh leh kengkawh zo loah a puh a, Parliament-ah rintawk lohna motion putluh a ni. Mahse ANC hian majority a neih avangin vote laknaah Zuma thlawptu lam an chak a ni. Nkandla biala a mimal in chei ṭhatna atan Zuma hi sorkar sum hmanga puh a ni bawk. India ram aṭanga pem lut mi hausa , Gupta chhungkua duhsakna uchuak taka lantir leh, cabinet member a ruat tur chungchang thlengah Gupta chhungkua hi inrawlh tirah puh a ni bawk.

Eirua puhna leh hmingchhiatna dang hrang hrang a neih avangin mipuiten Zuma hi president aṭanga bang turin an nawr fo a, an party pawhin bang turin duh mah se official erawh chuan thuchhuah an siam lo. Mahse Pathianni khan party thuneitu sang, ANC National Executive Committee chuan bang tura hriattirna pek an rel ta a ni.

ANC official-ten President a nihna aṭanga bang tura ngenna an pek hnuah pawh Jacob Zuma hian a lo hnial a, ban a tum loh thu sawiin, bang tura an ngen mai chu hriatthiam har a tih thu a sawi a ni. Mahse party chuan Zuma hi a ban loh chuan Parliament-ah amah rin tawk lohna, no-confidence vote lak a nih tur thu a sawi a, hemi hnu hian Zuma chuan Nilaini zana TV-a a thu sawiah a ban thu hi a puang ta a ni.