Argentina-in lawmman pek tiam

Argentina sorkar chuan nikum November 16 aṭanga South Atlantic tuifinriat-a chin hriat loa awm, tuihnuailawng San Juan awmna chhui zuina kawnga chanchin leh data rintlak hrilh thei hnenah lawmman, dollar maktaduai nga pek a tiam.

Defence ministry chuan thuchhuah siamin, chin hriat loha awm mek tuihnuailawng awmna chin hriat a nih theihna tura chanchin hrilh theih chu lawmman pek an ni dawn tih a sawi a ni. President Mauricio Macri-a kaihhruai sorkar chuan Argentina navy-ten tuihnuailawng bo an zawnna kawnga pui thei, private company-te pawh lawmman ṭha tawk tak pek a tum thu a sawi bawk.