Zimbabwe eptu hruaitu Tsvangirai a thi

Zimbabwe ram eptu pawl hruaitu, Morgan Tsvangirai chu kum 65 mi niin cancer natna vangin Nilaini khan a thi.

Eptu party, Movement for Democratic Change party vice president Elias Mudzuri chuan Tsvangirai-a thih thu hi a puang a, mi entawntlak leh an rama democracy tundin a nih theihna tura beitu an chan ta tih a sawi.

Tsvangirai hi kum 2016 khan colon cancer a nei tih puan a ni a, hemi hnu hian damdawi-inah in enkawlin ṭum eng emaw zat a lut tawh a ni.

Kum 2009-2013 chhung khan Tsvangirai-a hi President hlui Robert Mugabe-a kaihhruai ṭangrual sorkarah prime minister a ni. Thusawi thiam tak a ni a, kum 1980-a Britain aṭanga independence an hmuh khan National Mine Workers Union branch chairman a ni a, 1988-ah Zimbabwe Congress of Trade Unions (ZCTU) secretary-general-ah inhlangkaiin, kum 1999 khan a Movment for Democratic Change (MDC) party a din a ni.

Kum 2008 inthlanah khan hetihlaia President, ZANU-PF hotu Mugabe laiin vote hmu tamin, 47% vote a hmu pha a, Mugabe hian 43% a hmu a ni. Mahse inthlan thawh hnihna neih tur chu Tsvangirai hian boycott-in, Mugabe chu hnehna a chantir a ni. Mahse ramdangte an inrawlh hnuah, Mugabe president-na hnuaiah kum 2009 khan ṭangrual sorkar siamin, Tsvangirai hi prime minister-ah dah a ni. Kum 2013 inthlanah MDC hi an chak zo ta lo a ni.