Afghanistan President Ghani a tlanchhia Taliban-ten indo a tawp thu an puang

Taliban firfiakte chuan an ram khawpui, Kabul-a Presidential Palace an la a, an rama an kuta a awm tawh tih sawiin indona chu a tawp ta tih an puang.

Pathiannia firfiakten Kabul khawpui an luh khan President Ashraf Ghani chu himna zawngin ram dangah a tlanchhe nghal a ni. President chuan thisen chhuahna nasa zawk thleng tur pumpelhna atan an ram hi a chhuahsan niin a sawi a, a kalna ram erawh a sawilang lo. Hetih lai hian Afghan mi tam tak chu an ram chhuahsan tumin Kabul airport-ah an inhnawhkhawm nasa tawh hle. US sipaite chuan Kabul airport hi an veng mek a ni.

Taliban thupuangtu, Moham­med Naeem chuan, "Vawiin hi Afghan mipui leh mujahideen tana ni ropui tak a ni. Kum 20 chhunga an beihna leh inpekna rah chhuak chu an hmu ta a ni," tiin indona chu a tawp ta tih a sawi.

Naeem chuan Afghanistan-a sorkar thar a ding thuai dawn tih sawiin, Taliban-te chuan ram dang nena inlaichinna ṭha tak neih a duh tih a sawi bawk. An ram aṭanga ramdang sipaite an chhuah kim hunah sorkar thar chu din a ni dawn tih a sawi. "Kan tum ber, kan ram zalenna chu kan sual chhuak tawh a ni. Kan ram hi midang beihna atana hman kan remti dawn lo a, mi dang tihnat pawh kan duh lo a ni," a ti.

Taliban hruaitute chuan an mi leh sate chu mipui tithlabar zawnga eng thil mah ti lo tur leh, an nitin hna pawh dan pangngai anga an thawh chhunzawm phalsak vek tura thupek an nih thu an sawi. "Nunphung pangaiin, a hma aia ṭha zawkin an awm dawn a ni," an ti.

Hetih lai hian khawthlang ram 60 chuang thuchhuah inṭawm siamin, Afghan mi leh ram dang mi awmte chuan Afghanistan an chhuahsan duh a nih chuan Taliban-te chuan an phalsak tur a ni, an ti. Afghan mipuite chu him leh thlamuang taka an awm an duh tih sawiin, an theihna kawnga puih zel an inhuam thu an sawi.