Taliban-ten ram an lak chhoh dan
Afghanistan aṭanga US leh NATO ṭangrual sipaite lakchhuahna ṭan an nih hnuah, kumin May thla aṭang khan Taliban firfiakte hian Afghanistan rama thuneihna chan tumin beihpui thlakin, hmun hrang hrangah Afghan sipaite an bei a ni.
Taliban-te hian beihpui an thlaknaah ram an la chak hle a, hun rei lote chhungin province khawpui hrang hrangte an la, ni 10 chhungin an ram provincial capital 34 zinga 26 an la hman a ni. Pathianni khan Kabul-a Presidential Palace pawh an luhchhuah thei a ni.
August 6 : May thla tir lam aṭanga beihpui an thlak hnuah Taliban-te hian August 6 khan Nimruz province khawpui, Zaranj chu sipaite kut aṭangin a la. Nimruz province hi Iran leh Pakistan ramri-a awm niin, Zaranj hi an hmanlai khawpui pawimawh tak a ni.
August 7 : Taliban-te chuan Jawzjan province hmarlam pum leh, province khawpui Sheberghan an la. Khawpui chhungah hian sipaite nen pawh an inkap nasa hle. He khawpui hi Afghanistan vice presidente hlui Abdul Rashid Dostum-a khua a ni.
August 8 : Hemi ni hian Taliban-te hian province pathum khawpui an la. Hmar lama Sar-e-Pul province khawpui Sar-e-Pul chu lain, khawpui chhunga official-te pawh an umchhuak a ni.
Kunduz province khawpui, Kunduz pawh lain, he khawpui hi Afghanistan-a khawpui lian panga a ni a, mi nuai thum dawn an cheng. Takhar province khawpui, Taluqan pawh August 8 tlai lamah firfiakte hian an la, mi tangte chhuahin sorkar official-te chu khawpui aṭangin an umchhuak bawk.
August 9 : Hmar lama Samangan province khawpui, Aybak chu Taliban-te hian lain, ni li chhunga provincial capital paruk an lakna a ni. Samangan hi a hma Taliban-te chet tlat tam lohna niin, Afghanistan rama province him ber zinga mi nia sawi a ni ṭhin.
August 10 : Chhim thlang lama Farah province khawpui, Farah chu security force-te nen rei vak lo an inbeih hnuah Taliban-te hian an la leh.
August 11 : Taliban-te chuan hmarlama Bakdakhan province khawpui, Faizabad chu lain, ni ruk chhungin province khawpui pakua an la hman a ni.
August 12 : Ni khat chhungin firfiakte hian province pathum khawpui an la. Ghazni province khawpui Ghazni chu sipaite nen nasa taka an inbeih hnuah an la a, Herat province khawpui Herat pawh firfiakte hian kar hnih chhung sipaite nena inbeih hnuah an la ta bawk. Kandahar province khawpui, Afghanistan rama khawpui lian pahnihna Kandahar pawh hemi ni hian sipaite kut aṭangin a laksak bawk a ni.
August 13 : Hemand province Lashkar Gah, Badghis province khawpui Qal-e-Naw, Ghor province khawpui Feruz Koh, Logar province khawpui Pul-e-Alam leh Uruzgan province khawpui Terakot-te chu Taliban-te hian ni khat chhungin an lak belh leh. Heng khawpui an lak dawn hian sipaite nen pawh an inbeih nasat a ngai lo a, khawpui ṭhenkhat phei chu inbeihna thleng loin Taliban-te kutah hian hlan an ni.
August 14 : Taliban-te hian an rama khawpui lian palina, venhimna ṭha tak awm nia sawi Balkh province khawpui Mazar-i-Sharif chu sipaite kut aṭangin an laksak leh.
August 15 : Hemi ni hian Taliban-te hian province khawpui pasarih lak belh lehin, Nangarhar province khawpui Jalalabad an lak hnuah an ram khawpui, Kabul chu lak tumin an hual zui a, zan lamah khawpui hi lutin Presidential Palace pawh an la zui leh a, thuneihna pawh an kutah an la zui ta a ni.