South Africa President thar atan Ramaphosa lalut

South Africa President hlui, Jacob Zuma'n a ban thu a puan aṭanga darkar 24 pawh tling lohah deputy president Cyril Ramaphosa chu Ningani khan president thar atan rinawmna thu tiamtirin Ningani khan lakluh a ni.

Ningani khan South Africa parliament-ah Zuma thlaktu atan rorellai African National Congress (ANC) party hotu Cyril Ramaphosa hi nominate a ni a, candidate awmchhun a ni.

President thar thlan dawn hian eptu pawl, Economic Freedom Fighters chuan ANC-in president thar a ruat chu duh loin, inthlan ṭhat an phut thu an sawi a, vote lak dawnin Parliament aṭangin an chhuak tau a ni.

President hlui Jacob Zuma hi eirukna hrang hrangah inhnamhnawiha puh a ni a, hei vang hian party ANC pawhin president a nihna aṭanga bang turin a ti a ni. ANC chuan Zuma hi a bang du loh a nih chuan Parliament-ah amah rin tawk lohna motion putluh a nih tur thu a sawi. Zuma hian a tirah chuan ban a tum loh thu a sawi a, mahse party lamin an nawr avangin Nilaini zan khan a ban thu hi a puang ta a ni.

Zuma hi India ram aṭanga pem lut, mi hausa Gupta chhungkuate chungah duhsakna hleihluak taka lantir leh, a kaihhruai sorkar inrelbawlna te, cabinet a thlan chungchang thlengah inrawlh tirah puh a ni bawk. Zuma a ban hnu hian Gupta chhungkaw zinga an puipa ber, Ajay Gupta manna tur thupek pawh tihchhuah a ni tawh niin official-te chuan an sawi.

President thar, kum 65 mi Ramaphosa chuan president atana lakluh a nih hnua thu a sawi hmasa berah, President hlui Zuma hnuaia an rama eirukna nasa tak awm chu tibo tura hma a lak nghal tur thu a sawi. Ramaphosa hian nimin khan an ram mipuite tan thuchah a sawi nghal bawk a ni. Ramaphosa chuan South Africa ram sum leh pai dinhmun siamṭhat chu a ngaih pawimawh hmasak ber tur a nih thu a sawi.

South Africa President thar Cyril Ramaphosa hi kum 1952, November 17-a piang a ni a, South Africa President panga-na a ni. Kum 2014-2018 chhungin Jacob Zuma president-na hnuaiah deputy president a ni a, kum 2017 December thla khan rorellai Afircan National Congress (ANC) president atan thla tlin a ni a, National Planning Commission chairman a ni bawk.