Duterte-an hel thah man lawmman pek zel tiam

Philippine President Rodrigo Duterte chuan an rama communist hel thattute chu hel pakhat an thahah lawmman dollar 384 zel pek a tiam.

President Duterte hian kar hmasa khan an ram chhim lama hel hluarna, Mindanoa-a tualchhung mite chu paramilitary fighter tura training pek a, an bial chhunga communist hel an thah chuan hel pakhat an thah manah dollar 384 (pesos 20,000) zel a pek tur thu a sawi a ni. Hemi hma hian Duterte hian sipaite hnenah helpawl zinga an hmeichhiate-te chu an zahmawhah kah sak turin a lo ti tawh bawk a ni.

Duterte-a thusawi hi human rights group leh activist hrang hrangten an sawisel a, president thusawi hian mipuite rilruah helho man duhna aiin thah zel duhna a siamsak a, hei hi 'right to life' palzutna dik tak a ni, an ti. President-in helho luman a siamsak zel chuan a kaihhruai policy ṭhat tawk loh zia a lantir chiang hle niin an sawi bawk.

Mindanoa-ah hian nikum aṭang khan sorkar sipai leh helho an inbei leh a, sipaite chuan communist helte hi Muslim firfiak pawl, Islamic State (IS) thlawpah an puh a ni. Mahse helho hian sorkar lak aṭanga rorelna dik leh intlukna duhin an bei niin an sawi thung.