Iran thlawhtheihna tlaah mi 66 an thi

Iran khualzin phur thlawhtheihna chu nimin khan Zagros tlangah a tla a, he thlawhtheihnaa chuang mi 66-te chu an thi vek niin media report chuan a tarlang.

Aseman Airlines thlawhtheihna, ATR-72, twin-engine turbroprop hi ram chhunga service niin, Iran khawpui Tehran aṭanga Isfahan provinvce-a Yasuf khua a pan laiin a chetsual ta a ni. Thlawhtheihnaah hian passenger 60 leh thawktu mi paruk an chuang a ni.

Emergency service hotu, Pri Hossein Koolivand chuan thlawhtheihna hi Semirom bialah a tla niin a sawi a, hei hi Iran chhimthlang lam tlang dung niin, Tehran aṭanga km 480 vela hla a ni.

Aseman Airlines hi semi-private air carrier niin Tehran-ah hmunpui a nei a, an ram chhunga hmun kilkhawr zawkahte a service a, international service pawh a nei tel bawk.

National emergency services thupuangtu Majtaba Khaledi chuan thlawhtheihna chetsualna hmunah hian helicopter tirh nghal a nih thu a sawi a, a tlakna hmun hi tlang chhengchhe tak a nih avangin ambulance tirh ngaihna a awm lo niin a sawi.