Turkish journalist paruk-te damchhung tang turin hrem

Turkey court chuan journalist paruk-te chu kum 2016 July thlaa Turkey sorkar paihthlak tuma beihnaah inhnamhnawihna neia puhin, kar kalta Zirtawpni khan damchhung tang turin an chhung thu a rel sak.

Journalist paruk thiam loh chantirte hi Turkey sorkar paithlak tuma beihnaa mawhphurtu bera puh, US-a inkhuar Islamic preacher Fethullah Gulen nena inzawmna neia puh an ni. Hetih lai hian court chuan kum khat zet thubuai siamsak loha hren tawh, German-Turkish journalist Deniz Yucel chu a chhuah zalen thung.

Human rights group hrang hrang chuan Turkey court rorel dan hi an sawisel a, sawiseltu zingah hian UN leh Organization for Security and Co-Operation in Europe (OSCE)-a media mite aiawhte pawh an tel.

Kum 2016, July 15 khan Turkey sipai ṭhenkhatin Turkey President Recep Tayyip Erdogan-a kaihhruai sorkar chu paihthlak tumin an bei a, sorkar thlawptu sipaite nen inbei zuiin buaina chhuak vang hian mi 250 an thi a ni. Hemi hnu hian Turkey thuneitu te chuan sorkar paihthlak tuma beihnaa inhnamhnawiha puhte dapchhuah hna thawkin, mi 50,000 chuang man an nih bakah sorkar hnathawk nuai 1.5 vel zet ban an ni bawk. Hnathawk ban zingah hian journalist, zirtirtu, police leh justice official eng emaw zat an tel a ni.