Pakistan-ah pawngsualtu thi tura hremna pe

Paksitan court chuan kar kalta Inrinni khan January thlaa hmeichhe naupang kum ruk mi pawngsuala thattu, kum 24 mi Imran Ali chu thi turin a chungthu a rel sak. Ali hi thubuai pali-ah thi tura hremna pek a ni.

January 9 khan Lahore chhim lama Kasur khuaa bawlhhlawh paihna hmunah hmeichhe naupang kum ruk mi, Zainab Ansari ruang hi hmuh a ni. He hmeichhe naupang hi pawngsual a nih hnuah thah a ni a, he thil thlengah hian police-te hnathawh dan duh khawp loh vangin Pakistan ram pumah mipuiten lungawi lohna lantirin buaina a chhuak zui a ni. Buaina chhuakah hian mi pahnihin nunna an chan a ni.

Hmeichhe naupang Zainab-i thattu, Imran Ali hi Punjab province-a hmeichhe naupang dang khawih leh thahnaa pawh a inrawlh niin police leh Punjab province chief minister-te chuan an sawi. Ali hi thubuai pali–naupang rukbo, pawngsual, tualthah leh firfiaka chetna thubuaiah thiam loh chantir vek a ni. Court thutlukna hi ni 15 chhungin a appeal thei ang.