Rio de Janeiro-ah sipaiten dan kenkawh hna thawk

Brazil-a Rio de Janeiro-a misual pawlten tharum thawhna an thlen avangin he state-a dan leh thupek kenkawh hna thawk turin sipaite rawih an ni.

Rio governor Luiz Fernando Pezao chuan kumtin an neih ṭhin, Carnival lawmnaah misual pawl intelkhawmten tharum thawhna an thlen avangin sipaite puihna a dil a ni. President Michel Tremor chuan misual pawl ho chet dan chu a dem thu sawiin, heng pawl intelkhawmte hian Rio state chhungah engkim chu an thuhnuaiah an dah tawh niin a sawi.

Governor-in sipai puihna a dil hnuah, Brazil sorkar chuan dan leh thupek kenkawh hna thawk turin sipaite hi a tir a ni. Sipaite hian police leh sercurity service dangte hnathawh dante an vil zui tawh ang.

Sipaite hi Eastern Military Command hotu Gen Walter Souza Braga Netto-an a ho dawn a ni. Gen Netto hian kum 2016 Rio Olympic Games neih tuma venhim hna thawhna kawnga ruahmanna fel tak a siam avangin fak pawh a hlawh phah hle.

President Tremer chuan misual pawlte nuaibo an nih theihna turin sorkar chuan na takin, a theih ang zawng zawngin hma a la dawn tih a sawi.

Rio Carnival lawmnaah hian misual pawlte hian buaina nasa tak an thlen a, silaia inbeihna leh inrawkna te a thleng nasa a, police officer pathum chu kahhlum an ni. TV news lamah pawh misual rualten carnival hmanga kal, ramdang mi an hual a, an rawk lai pawh an tilang a ni. Tharum thawhna a thlen nasat avang hian governor chuan sorkar laipuiah puihna dilin, ralthuam nena inthuam misual pawlte bei let tur chuan sipaite an inrawlh a ngai tih a sawi a ni.