Taliban-i'n mipuite ngaihdamna an puang : Sorkar thawhpui turin hmeichhiate sawm

Taliban firfiak pawl chuan Afghanistan ram thuneihna an chan hnuah, nimin khan ngaihdamna thu puangin sorkar hnathawh hrang hrangte chu an hna thawh chhunzawm tur leh, hmeichhiate pawh an kaihhruai sorkar chu zawm a, thawhpui turin a sawm.

Firfiakten thuneihna an lak hnuah ram chhung mipuite chu an hlauthawng nghal hle a, mi tam tak chu Afghanistan chhuahsan tumin an bei mek a, ram hrang hrang pawhin an mi leh sate an thiar chhuak mek bawk. Nimin khan Kabul khawpui chhunga buaina leh inbeihna thleng lian tham report awm lo mah se, mi tam zawk chu pawn chhuak ngam loin an awm a ni.

Taliban Military Commisison hotu Mullah Yaqoob chuan mipuite hlauhthawnna tihkian hi a tum a, phalna nei loin tu in mah dapsak theih a nih lo tih pawh a sawi. Taliban-in Afghanistan ram an sawina, Islamic Emirate chuan hmeichhiate chu tuartir a tum lo tih sawiin, Sharia law zulzuiin hmeichhiate pawh sorkar inrelbawlnaah an tel vek tur a ni, a ti.

Hetih lai hian kum 1996-2001 chhunga Afghanistan-a Taliban-ten ro an rel lai khan hmeichhiate dinhmun hi a chep hle a, pawn lama hnathawh bakah school an kal pawh phalsak an ni lo a, an hmai an khuh reng tur a ni a, pawn an chhuah dawn pawhin an chhungte mipa tu emaw berin a kalpui zel tur tih a ni. Hei vang hian Taliban-ten thuneihna an chan leh tak avangin hmeichhiate rahbehna a thlen leh hluahna a nasa nghal hle.

Russia-in Taliban hnuaiah Kabul a him zawk tih sawi
Ram hrang hrangte'n Taliban firfiak pawl chet dan an dem thu an sawi laiin, Afghanistan-a Russia ambassador Dmitry Zhrinov chuan Taliban chet dan chu fakin, president tlanchhe ta, Ashraf Ghani hnuaiah aiin Taliban-te hnuaiah Kabul dinhmun chu aṭhain a him zawk niin a sawi thung.

Zhrinov chuan ram dangte ang bawkin Taliban-te ram lak chak dan chuan Russia pawh a ṭhawng hle tih a sawi a, hemi rual hian Taliban-te chet dan chu ṭha tak leh tum mumal tak nei a ni tiin, Kabul boruak pawh a muanawmin boruak pawh a dai ṭha hle a ni, a ti.