US President-in Afghan sipaite a dem

US President Joe Biden chuan Afghanistan aṭanga America sipaite lakchhuah an nih hnu lawkah Taliban-ten sorkar thuneihna an chhuh sak leh chungchangah, US sipaite lachhuak tura thutlukna a lo siam tawhah chuan a ngaihdan ngaiah a la ding reng tih a sawi. Hemi rual hian Aghanistan sipaite chu firfiakten beih let tum tak tak tawk loha puhin a dem thu a sawi nghal bawk.

Taliban-ten Afghanistan khawpui hrang hrang an lak hnu leh, Kabul luhchilha an ram thuneihna an laksak hnuah Joe Biden hi a ṭawngchhuah mai loh avangin dem leh sawisel pawh a hlawh hman hle. Sawiseltu zingah hian general hlui, human rights group, Republican party mi leh sa bakah Democratic party roreltute pawh an tel a ni.

Thawhṭanni zan khan Afghanistan chungchangah ṭawng chhuakin, Biden chuan a thutlukna lo siam tawh kha ka la thlawp reng a ni. Afghanistan-a US mission chu an ram dinsakna tur a ni ngai lo tih sawiin, Afghanistan sorkar tlusawp hma leh Taliban-te ram la chak lutuk chu an rin phak bak a nih thu a sawi. "Afghan sipaite ngeiin an ram tana beih an tum lohna hmunah America sipaite chuan beiin indona hi a hmachhawn tur a ni bik lo," a ti.