Haiti lirnghing-ah mi 1,419 thi tawh

Haiti chhimthlang lama kar liam ta Inrinnia lirnghing na tak vanga chhiatna thlenga thi chu mi 1,419 an tling tawh tih thuneitute chuan an sawi.

Magnitude 7.2-a na lirnhing vang hian mi 6,900 velin hliam an tuar bawk a, chenna in 37,000 chuang a chhe tel bawk tih civil protection agency chuan a tarlang.

Agency chuan hliam tuar na zual bik te chu enkawlna ṭha an dawn theih nan helicopter hmanga thiarchhuah an nih thu a sawi. Hliam tuar zinga a tam zawk (1,133) hi Les Cayes khawpui chhim lama mi te an ni.

Haiti khawipui, Port-au-Prince khawthlang lama awm, Les Cayes khawpui leh a chhehvela lirnghing hian chhiatna a thlen nasa hle a, building tam tak tlusawp zingah school leh biak-inte pawh a tel.

Civil protection agency director Jerry Chandler chuan ramdang hnen aṭanga puihna an dawn ṭhat thu sawiin, "Ram pawn aṭanga kan ṭhiante min puihna nen kan thawkho thei zel a ni. Ram dang tam takin min puih an inhuam thu pawh an sawi bawk," a ti.

Lirnghingin chhiatna a thlen avanga mipuite harsatna an tawh mek lai leh, in chimin a delhte zawn leh chhanchhuah hna thawh mek karah, Haiti ram hi thlipui na tak Tropical Depression Grance-in a nuai zui leh bawk. Thawhṭanni zan khan ruah keng tel, thlipui na tak hian an ram hmarthlang lam a nuai a, Port-au-Prince ah pawh ruah a sur nasa hle. Ruah sur nasa avang hian leimin leh tuilian bawhawk a thlen hlauhthawnna pawh a lian hle.