Israel-in Poland PM thusawi sawisel

Poland Prime Minister Mateusz Morawiecki-an Indopui II hunlaia Juda mi tam tak suat an nih khan pawikhawihtu zingah Juda mi ngei pawh an tel nia a sawi chu Israel chuan na takin a sawisel.

Israel Prime Minister Benjamin Netanyahu chuan Munich Security Conference-a Poland PM Mateusz Morawiecki thusawi dan chu a thinurthlak hle niin a sawi a, a thusawi duh dan hian history a hriatchian tawk loh zia a tilang hle a ni, a ti.

Poland hian Indopui II hunlai Germany Nazi-ten Juda mite chunga pawikhawihna nasa tak an thlen chungchang sawinaah, Poland ram inhnamhnawih anga sawilan tel khapna dan hi tun hnaiah a lo siam tawh a, hei hi Israel chuan a lo sawisel tawh bawk a ni. Poland Parliament chuan Nazi camp chungchang sawinaa an ram hming sawilan ṭhin, Polish death camp tia sawi tel ṭhin khapna hi a pass tawh a, President Andrzej Duda pawhin a hming a sign hnan tawh bawk a ni. Germany Nazi-te hian kum 1939-a Poland an run hnuah Poland ramah hian camp an siam a, heng camp-ah hian Juda mi tam tak tihhlum an ni. Nazi-te hian Juda mi maktaduai ruk vel an tihlum a, an zingah hian Polish Jews maktaduai thum vel an tel.