Turkey-in chemical ralthuam hmanga puhna pha

Turkey-in Syria hmarthlang lama Kurdish YPG fighter-te laka beihpui an thlaknaah chemical ralthuam a hmang nia monitoring group leh Syria state media-ten an sawi chu thu dik lo a nih thu Turkey official chuan a sawi.

Turkey President Recep Tayyip Erdogan-a chief adviser, Ysin Aktay chuan Afrin biala beihpui thlaknaah hian khawvelin a khap, chemical ralthuam hmang anga puhna chu thil awm lo tak a nih thu a sawi.

Syrian Observatory for Human Rights (SOHR) chuan kar kalta Zirtawpni khan Turkey-in Afrin biala Al-Sheikh Hadid a beihnaah mi pathumin hliam an tuar niin a sawi. Heng mite hian thawk lamah harsatna an tawk a, an mit naute pawh a na tel niin a sawi. Al-Sheikh Hadid hi Afrin khawthlang lam, km 30 vela hlaa awm a ni. Medical lam pawhin Turkey sipaite hian tur an hmang ngei a, mahse eng ang tur nge an hman erawh hriat theih a la ni lo niin SOHR chuan a tarlang.

Turkey sipaite chuan Afri biala beihpui an thlaknaah civil mi thi an awm lo tih pawh an sawi. Thla khat liamta aṭanga beihpui an thlaknaah hian firfiak 1,614 leh sipai 32 an thi tawh niin a sawi.