Gaza Strip ramri-ah beihpui thlak

Palestinian miten kar kalta Inrinni-a bomb an tihpuah avanga Israel sipaiten hliam an tuar phahna chu Israel chuan chhang let nghalin, Inrinni zan leh Pathianni zing khan Israel sipaite chuan Gaza ramri bulah beihpui an thlak.

Palestinian miten Khan Younis khuaa bomb an tihpuah avang hian Israel sipai pali chuan hliam an tuar a ni. Hemi hnua Israel sipaiten tank hmanga Gaza an beihnaah Palestinian mi pahnih an thi a, Israel air force-te chuan Gaza Strip-a roreltu Hamas firfiak pawl hmun eng emaw zat an kapchhe bawk.

Israel sipaite chuan Hamas ho hmun pawimawh 18 an kapchhia niin an sawi a, heng zingah hian ralthuam siamna hmun leh leiverh te pawh a tel niin an tarlang. Observation post pahnih pawh an kapchhia niin an sawi.

Palestinian official-te chuan Israel sipaite hian Hamas training camp pathum bakah, pawl dang pakhat camp pawh an kapchhia niin an sawi a, Hamas military wing Izzedine al-Qassam Brigades chuan an ram china Israel thlawhtheihna lut lo dan nan hian anti-aircraft missile an hmang niin a sawi bawk.