Zimbabwe eptu hruaitu vui liam ta

Zimbabwe eptu hruaitu Morgan Tsvangirai chu Thawhṭanni khan an ram khawpui, Harare-ah state chawimawina nena vui a ni a, nimin khan an khua Buhera-ah phum a ni.

Movement for Democratic Change (MDC) hruaitu, Tsvangirai hi hun rei tak cancer natna a vei hnuah khar hmasa khan South Africa-a Johannesburg damdawi-inah a thi a, Pathianni khan a ruang hi Zimbabwe thlenpui a ni.

Harare-a Tsvangirai vuina inkhawm buatsaihah hian mipui tel an ṭhahnem hle a, MDC hruaitu thlahna hun hmang tur hian ramchhung hmun hrang hrang aṭangin mi an kalkhawm a ni. President Emmerson Mnangagwa chuan Tsvangirai-a vuina senso leh damdawi-ina a inenkawlna sensote chu sorkarin a tum vek dawn tih a sawi. Mnangagwa hian Pathianni khan Harare-a Tsangvirai-a in chu tlawhin, a chhungte hnenah a tawrhpui thute a hrilh a ni.

Thawhṭanni-a Tsvangirai-a vuina inkhawm buatsaihah hian Africa ram dang hruaitu eng emaw zat an tel bawk a, Zimbabwe-a democracy tundin a nih theihna atana Tsvangirai-a hnathawh te an fak a ni.

Namibia eptu hruaity McHenry chuan Tsvangirai-a chu democracy tana beitu mi chak tak a ni tih sawiin, amah avangin Zimbabwe ramah eptu lamte pawh dinhmun sang takah an invawrh theih phah a ni, a ti. Acting MDC-T president Nelson Chamisa chuan inthlanpui neih turah Tsvangirai-a tan hian hnehna chan ngei an tum dawn tih a sawi bawk.