Maldive President-in emergency pawhsei rawt

Maldive President Abdulla Yameen chuan an rama emegency puan mek chu ni 30 atana pawhsei a rawt.

Maldive Supreme Court-in eptu hruaitu mante chhuahna tur thupek a siam chu President Yameen-a kaihhruai sorkar hian a zawm duh lo a, hemi hnua politics lam buaina a awm zui vangin February 5 khan Yameen hian ni 15 chhung atan emergency hi a puang a ni. Emergency puan hi Thawhlehni kha a tawp hun a ni a, hei vang hian Thawhṭanni-a Parliament inkhawmah ni 15 dang pawhsei rawt a ni a, mahse a hnuah President office chuan ni 30 chhung pawhsei belh tum a nih thu a sawi leh a ni.

Parliament-a emergency pawhsei chungchang ngaihtuahnaah hian rorellai Progressive Party of Maldive (PPM) MP 39-te an tel a, mahse eptu lamin an boycotta ni. MP-te hian emergency pawhsei rawtna hi Parliament national security committee hnenah an thlen a, anni hian ngaihtuahin an lo pawmsak a ni.

Eptute chuan President rawtna siam hi Parliament member 85 zinga 43 talin an pawmpui a ngai niin an sawi thung. He rawtna hi Parliament-in a pawmsak a nih pawhin danin a pawmpui loh thu a sawi.