Indonesia-a Sinabung tlang a kang

Indonesia-a Sumatra thliarkara Sinabung tlang chu nimin khan a kang a, vut sa leh meikhu nasa takin a vawrh chhuak.

Mount Sinabung-ah hian kum 2010 aṭang khan tlang kang a invawrh chhuak fo a, kum 2016 khan meikhu chhah tak tak invawrh chhuak vangin hun eng emaw chen nunphung a khaihlak phah a ni. Thawhṭanni-a Sinabung tlang aṭanga vut sa leh meikhu invawrh chhuak hi meter 5,000 zeta sangte a thleng a ni.

Volcanology agency chief Kasbani chuan nimina Sinabung tlang kang hi kumin chhunga a nasa ber a nih thu a sawi a, mahse tlang kang vang hian hliam leh thi an awm hriat a ni lo. Tlang aṭanga vut sa invawrh chhuak hian tlang bulṭhut aṭanga km sarih biala khuate chu a khuh nasa hle a ni.