Oxfam-in Haiti hnenah ngaihdam dil

Chhawmdawl hna thawktu pawl pakhat, Oxfam hotu Marck Goldring chuan Haiti-a an staff-te mipat hmeichhiat kawnga mawi lo taka chea puh an nih chungchangah Haiti sorkar hnenah ngaihdam a dil.

Kum 2010-a Haiti rama lirnghing nasa takin chhiatna a thlen tuartute chhawmdawl na thawktu, Oxfam staff zinga ṭhenkhat chuan Haiti khawpui, Harare-a an hmunpuiah nawhchizuarte lalutin, nuam an chen nasa hle nia sawi a ni. Hemi chungchang hi tun thla tir lam khan sawichhuah niin, Oxfam pawhin Haiti-a an hnathawktute hi a chhui nghal a, hnathawktu pasarih pawh an bang tawh niin a tarlang a ni. Staff member pali chu ban niin, midang pathumte chu an ban dilna pawmsak an ni a, an zingah hian country director hlui Roland van Hauwermeiren pawh a tel.

Oxfam in hmingchhiatna nasa tak a tawh avang hian charity dang hnathawh pawh a nghawng phah rin a ni a, Oxfam-in UK-a sum a hmuh dante pawh ennawn mek a ni. Thawhlehni khan UK politician-te chuan Oxfam hotute pawh thu an lo zawtfiah tawh a ni.

Charity chief executive Mark Golding chuan Oxfam-in Haiti mipuite laka thil pawi tak a thlen tir avanga pawi a thih thu sawiin, chhawmdawl hna an thawh zel kawngah pawh nghawng a nei ngei dawn niin a sawi. Oxfam global operation hotu, Winnie Byanyima pawhin an pawl hmingchhiatna chu thil zahthlak tak a nih thu a sawi.

Haiti minister of planning and external cooperation Aviol Fleurant chuan Oxfam staff-te chet dan chu Haiti sorkar pawhin a chhui mek thu a sawi a, Oxfam ngei pawhin an staff-ten kum 2011 khan nawhchizuarte an dawr ṭhin tih pawh a pawm a, heng mite hian an office-ah te an lalut ngei tih a pawm a ni, a ti. Mahse Oxfam report hi Haiti thuneitute kut a thleng lo niin a sawi.