NKorea-in US VP nena meeting neih tur ṭhulh

US sorkar chuan South Korea-a Winter Olympics neih laia an ram Vice President Mike Pence leh North Korea official-ten meeting an neih tur chu chawpchilh takin NKorea lamin an ṭhulhsan leh niin a sawi.

Mike Pence-a hi Pyeonchang, South Korea-a Winter Olympics opening ceremony hmangin a kal a ni. NKorea palaite nena meeting neih an tum thu hi a hmain sawilan a ni lo a, mahse US-a Pence a let aṭanga kar khat hnuah NKorea-in meeting neih tum a ṭhulh thu hi puanzar a ni chauh a ni.

State Department thupuangtu Heather Nauert chuan he hun hi Vice President Pence chuan NKorea hnenah nuclear leh ballistic missile programme a kalpui mek titawp tura nawrna hun remchangah hman a tum thu a sawi a, mahse NKorea official-te chuan meeting kaltlangpui hi an duh ta lo a ni, a ti. Hetianga hun remchang an neih NKorea lamin an tihlawhtling lo chu pawi an tih thu a sawi.

NKorea chuan US-in meeting ṭhulh a nih leh chungchang a sawi hi a la chhang lo a, mahse a hma pawhin Pyeongchang-a Winter Games neih chhunga Pence meeting neihpui chakna leh tumna an neih loh thu a lo sawi tawh a ni.