Myanmar sorkar paihthlak hnuah mi 1000 chuang thi tawh

February 1-a sipaite'n Myamnar sorkar an paihthlak hnu tualchhung buaina chhuak vangin sipai kutah mi sang chuang an thi tawh niin Assistance Association of Political Prisoners (AAPP) activist group official-te chuan a tarlang.

AAPP secretary Tate Naing chuan pawisawi lo nunna 1,001 sipaite chuan an la tawh niin record-ah chuan a lang a, thi zat tak phei chu an chhinchhiah ai hian an tam zawk niin a sawi.

Sipai thuneitu lam chuan a hmain AAPP data hi a dik loh thu an lo sawi tawh thung a, an data chu an uar lutuk tih an lo sawi tawh a ni. Security force lam pawh eng emaw zat an thi ve bawk tih sipaite chuan an sawi tawh a, AAPP hian thi zat an tarlanah hian sipai thi an tarlang tel lo thung.

Myanmar-ah hian sipaite chuan nikum November thlaa inthlanna neiha National League for Democracy party chak dan chu a dik lo tih sawiin February thla tirah khan Aung San Suu Kyi leh a kaihhruai sorkar chu an paihthla a ni. Hemi hnu hian tualchhung buaina nasa tak chhuakin, nitin sipai sorkar duh lohna hi lantir a la ni a, mi tam takin nunna an chan phah tawh bawk.

Sipai 1,500 vel an bang tawh
Sipai chakna hmanga civil sorkar paihthlak anih aṭang khan sipai 1,500 vel chu an bang tawh a, tualchhung sipai pawl an zawm tih Myanmar sipai captain hlui chuan a sawi.

April thlaa sipai aṭang bang, Lin Htet Aung chuan sipai aṭanga bang hi an la pung zel tih a sawi a ni. June aṭang khan Tatmadaw (armed forces) bansan chu a let zetin an pung tawh a ni, a ti.

Sipaiten an paihthlak tak, mipuiten an aiawh tura an thlan tlin Parliament member-te chuan civil sorkar paihthlak tak aiawhtu tur National Unity Government (NUG) an din a, NUG hian sipaite do letna atan hian People's Defence Force tih hmingin armed wing pawh an din zui bawk. Myanmar sipai aṭanga bang tam tak hian People's Defence Force hi an zawm nia sawi a ni. Myanmar hian sipai nuai li chuang a nei nia hriat a ni.

Myanmar sipai, Tatmadaw leh helpawlte chu border area leh khaw te zawkah an la inbei reng a, hetih lai hian khawpui lian, Yangon leh Mandalay-ahte sipai sorkar duh lohna lantir chhunzawm reng a la ni bawk.