Covid-19 vaccine la turin Pope Francis-a'n mipuite ngen

Roman Catholic kohhran hotu, Pope Francis chuan nimin khan coronavirus vaccine chu hmangaihna lantirna atan la vek turin mitinte a ngen.

Covid vaccine la tura campaign buatsaih, 'It's Up to You' tana thuchah a siamah, Pope chuan,"Pathian khawngaihna vang leh mi tam tak te hnathawh kaltlangin Covid-19 laka kan him theih nan vaccine kan nei thei a ni," tiin, "Hei hian hripui leng titawp turin beiseina min pe a ni. Mahse mitin in kan lak theih leh kan thawhho chauhin kan titawp thei ang," a ti.

"Vaccine lak hi hmangaihna kan lantirna a ni, mipui tam zawkin vaccine an lak theihna atan kan thawhchhuah hi hmangaihna kan lantirna chi khat a ni. Keimahni , kan chhungte, ṭhiante leh mipui kan hmangaihzia kan lantirna a ni" tiin kum 84 mi Pope Francis chuan a sawi.

December 2019-a China aṭanga hripui darh hnu khan coronavirus vang hian khawvel pumah mi 4,370,427 an thi tawh tih AFP official data chuan a puang.

Vaccine semchhuah runpui hi ram hrang hrangah kalpui mek ni mah se, ngaihruatna thu leng vak te leh sorkar emaw damdawi siamchhuaktu emaw rintawk lohnate avangin vaccine la duh lo tam tak an awm a, hei vang hian hri hi a darh leh nia sawi a ni.

Khawvela Covid-19 vanga thi tam berna US-ah chuan hri vanga thi leh hri tuar na zual te chu vaccine la lo te an ni.