March 2-ah Billy Graham vui dawn

Pathian thuhriltu ropui, Reverend Billy Graham chu kum 99 mi niin Nilaini khan Montreat, North Carolina-a a chenna inah a thi a, March 2-ah vui a ni ang.

Billy Graham-a ruang hi nimin khan Ahseville-a Billy Graham Training Centre-ah lak a ni a, naktuk hian chhungkaw bil ten ṭawngṭaina hun an hman zawhah a ruang hi Charllote-a Billy Graham Library-ah lak a ni leh ang. He hmunah hian Thawhṭanni leh Thawhlehni-ah zing dar 8 aṭanga zan dar 10 thleng amah zahna hlan leh thlah duhte tan tlawh theih a ni ang.

March 2, karleh Zirtawpni khian Billy Graham Library pawna puan-in siamah a vuina hun hman a ni dawn a, mahse he hun hi sawm bikte tan chauh buatsaih a ni ang. Official-te chuan vuina inkhawmah hian mi 2,300 an tel beisei a nih thu an sawi. Vuina inkhawm hi chhun dar 12-ah ṭanin, minute 90 chhung neih a ni dawn a, Billy Graham-a fapa Franklin Graham chuan thu a sawi dawn a ni. Thusawi tur zingah hian First Baptist Church hotu Dr Donald Wilton bakah Rev. Graham-a executive assistant Dr David Bruce te pawh an tel.

Graham-a ruang hi Library prayer garden hmarchhak lama kum 2007-a thi a nupui, Ruth-i thlan bulah phum a ni ang. Graham-a kuang tur hi kum 2006 khan ama ngenna angin Angola Prison-a tangte chuan kutin an lo siamsak tawh a ni.

March 2-a Billy Graham-a vuina inkhawma tel tur hian US President Donald Trump leh US president hlui la dam zawng zawng chu sawm tel an ni.