UN-in Syria-a beihpui thlak titawp turin ngen

United Nations official-te chuan Russia thlawpnaa Syria sipaiten helho kuta awm, Eastern Ghouta-a beihpui an thlak mek chu titawp turin an ngen.

Syria sipaite chaun Nilaini khan Damascus khaw dai, Eastern Ghouta hi Russia indo thlawhtheihnate nen an bei chhunzawm zel a, mi 27 an thi a ni. Ni thum kalta chhunga he hmuna beihpui an thlakna avanga thi hi 270 an tling tawh a, an zingah hian naupang 60 an tel.

Nilaini-a UN Security Council meeting-ah Guterres chuan Easter Ghouta-a beihpui thlaknaa inhnamhnawihte chu an thiltih chawlhsan vek tura a ngen thu a sawi a, an mit hmuh lai ngeiin mihringte chunga chhiatna nasa tak a thleng a, hetiang thil thlen chhunzawm tir zel chu an thei lo tih a sawi.

Eastern Ghouta-ah hian mi nuai li vel an cheng a, hel ho kutah awmin sorkar sipaiten lak let tumin an bei mek a ni. Sipai leh helte hi hun rei tak an inbeih tawh avangin he biala cheng mipuite dinhmun pawh a chhe tawh hle nia sawi a ni.

Hetih lai hian Russia chuan Nilaini-a Eastern Ghouta-a beihpui thlaknaah hian a inhnamhnawih ve lo niin a sawi a, US official-ten Russia a tel ve nia an sawi chu thu belh chian dawl lo a ni, a ti. Russia chuan Eastern Ghouta buaina chinfelna tura inbiakna neih tum chu helho hian an ngaihsak duh lo a, an ralthuamte an dah thla duh lo niin a sawi a, hei bakah hian buaina bial aṭanga civil mi tlanchhuah tute pawh an dang niin a sawi bawk.