UNICEF deputy director a bang

United Nations children's agency deputy director, Justin Forsyth chu Save the Children hotu a nih laia a thawhpui hmeichhiaten mawi lo taka chea an puha an hekna kaihhnawihah Ningani khan a bang.

Justin Forsyth chuan thuchhuah siamin, UNICEF aṭanga ban a tumna chhan chu thil a tihsual vang ni loin, an puhna avanga agency hming a chhiat a hlauh vang zawk niin a sawi. Forsyth hian kum 2016 khan UNICEF hi a zawm a, a zawm dawn hian a laka complaint awm hi an hriat loh thu UNICEF chuan a sawi.

Save the Children-a thawk hmeichhe ṭhenkhat chuan kum 2011 leh 2015 khan Forsyth-a lakah hian complaint thehlutin, message mawi lo tak taka a thawn ṭhin bakah, staff member hmeichhiate thawmhnaw hak chungchangte a sawisel ṭhin niin an sawi a ni.

Forsyth chuan an puhna chungchang hi kum eng emaw zat chu uluk taka ngaihtuah a ni tih a sawi a, a chungchang an sawi dan ṭhenkhat chu a dik lo a, hei bakah hian agency thil tum leh hnathawhte tihchhiat tumna nia a ngaih thu a sawi.

UNICEF hian ram 190-ah hna a thawk mek a, an hnathawhna tam zawk hi sorkar, private organisation leh mimal thlawptu sum pek hmanga thawh a ni.

UNICEF Executive Director Henrietta Fore chuan Forsyth-a banna hi a pawmsak a, kum hnih kalta chhunga UNICEF-in naupang dinhmun ṭha lo zawkte puih leh chhanchhuah hna a thawhna kawnga Forsyth-a inpekna leh a hnathawhte avangin a chungah an lawm hle tih a sawi. Thil dang zawng aiin an mission chu a pawimawh a ni, a ti.