UNSC-in Syria-ah ni 30 inkahhai a rel

United Nations Security Council (UNSC) chuan kar kalta Inrinni khan Syria chungchang ngaihtuahin meeting a nei a, Syria rama ni 30 chhung inkahhai puanna tur resolution an siam.

Syria chungchanga resolutlion siam hi lungrual takin an pawm a ni. Inkahhai puan a nih chhung hian tualchhung indona tuartute tan chhawmdawlna leh damdawi lama enkawlna te pek theih an ni dawn a ni.

Meeting hi Zirtawpnia neih tura ruahman lawk ni mah se resolution siam dan turah Russia leh UNSC member-te an inrem theih mai loh avangin Inrinni-ah sawn a ni a, Inrinni chawhnu dar 2.30-ah khan vote hi lak a ni ta a ni.

UN-a US ambassador Nikki Haley-i chuan Russia chu Security Council meeting a tihkhawtlai vangin a sawisel a, mahse resolution an pass takah hian thu ṭhenkhat tlemte leh comma tih vel bak thlak danglam a awm lo niin a sawi.

Russia hian resolution siama inkahhai puan chu hman nghal tur tia sawi chu a duh lo nia sawi a ni a, mahse an siamṭhat hnuah inkahhai puan rawtna chu tikhawtlai loa hman nghal ni se tiin an sawi ta a ni.

Syrian Observatory for Human Rights (SOHR) chuan UNSC-a resolution pass a nih hnu lawk hian Syria sorkar chuan helpawl kuta la awm, Easter Ghouta chu a bei leh nghal niin a sawi. Nimina Eastern Ghouta-a sorkar sipaiten beihpui an thlaknaah hian mi 500 chuang an thi a, an zingah hian naupang 123 an tel niin a tarlang. Russia puihnain Syria sipaite hian February 18 aṭang khan Damascus khaw daia awm, Eastern Ghouta-ah hian beihpui an thlak thar leh a ni.