SKorea-ah NKorea palaite duh lohna lantir

South Korea-a Pyeong-chang-a Winter Olympics kharna inkhawm hmang tura kal, North Korea palai hruaitu General Kim Yong-chol-a duh lohna lantir leh lo dan tumin ramri bulah South Korea mi ṭhenkhatin nawrh an huaihawt.

Gen Kim Yong-chol hi kum 2010-a South Korea indo lawnglian tihpilsaknaa mawhphurtuah puh a ni a, he lawnglian pil vang hian mi 46 an thi a ni. Mahse NKorea chuan he thilah hian inhnamhnawihna a nei lo niin a sawi thung.

Lawng pila thi chhung-te leh South Korean conservative MP-te chuan Gen Kim-an an ram a tlawh tur hi duh loin nawrh an lo huaihawt a ni.

Kum 72 mi, North Korea military intelligence chief hlui, Gen Kim hian nimin tlaia Winter Olympics kharna inkhawm neiha tel tura kal, North Korea palai member pariat-te a ho a ni. Gen Kim hian SKorea President Moon Jae-in pawh a hmu dawn nia sawi a ni.

Gen Kim hi South Korea indo lawng tihpilnaa mawhphurtua puh a ni bakah, kum 2014-a North Korea hotu Kim Jong-un-a chanchin fiamthu thawhna atana hmanga film siam, The Interview tihchhuah tur dang tura Sony Pictures beihnaah pawh a inrawlh nia puh a ni bawk.

Kum 2006-2008 inkara Korea ram pahnihten inbiakna an neihah khan Gen Kim hi NKorea ram aiawhte hotu a ni a, a hnuah General Reconnaissance Bureau-ah a hotu ber niin, 2016 khan civilian intelligence agency United Front Department hotu ah dah a ni.