Haiti lirnghing-ah mi 2,189 thi tawh

Haiti rama magnitude 7.2 a na lirnghing rapthlak tak thleng vangin Nilaini thleng khan mi 2,189 an thi tawh tih civil protection agency chuan a sawi.

Haiti khawpui Port-au-Prince aṭanga km 160-a hlaah kar liamta Inrinni khan magnitude 7.2-a nain lir hi a nghing a ni. Agency chuan lirnghing tirh khan mi 12,260 chuan hliam an tuar tih sawiin, damdawi-in te chu an luah khat vek tih a tarlang.

Civil protection agency chuan chhiatna thlen hnu hian mi 332 chu chin hriat loha an la awm thu leh zawn hna kalpui mek a nih thu a sawi. Lirnghin vanga chhiatna nasa tak a thlen hnuah, thlipui Tropical Storm Grace thawk lehin ruah nasa tak a a sur zui bawk avangin chhanchhuah hna hi chak taka kalpui theih a ni lo.

United Nations chuan naupang 5,00,000 chuang te chu chenna hmun, ei leh in tur tlacham emaw nei loin emaw an awm mek tih a sawi.

"Haiti-a chhungkua tam takte chuan lirnghing rapthlak tak avang hian an neih engkim an chan tawh a, tui lian avangin tui nen inchiahpiah rengin an khawsa mek a ni" tiin UN Children's Fund (Unicef) aiawh Bruno Maes chuan a sawi.

Lirnghing tuar na ber, Les Cayes khawpuiah chuan mi tam tak chenna in nei loin an awm a, heng mite hi football field-a buk sak chawpah an khawsa mek a ni. UN World Food Programme chuan lirnghing tuarte chhawmdawl leh ṭanpui hna chu Haiti-a thuneitute nen an thawk mek tih a sawi.

Haiti ram hian kum 2010-a lirnghing rapthlak tak an tawrh avanga harsatna hrang hrang an tawha an insiamrem chhoh laiin chhiatna dang hi an tawk leh ta a ni.

President inthlanpui neih hma zawnga thuneihna chang tura an ruat, Prime Minister Ariel Henry chuan thla khat chhung state of emergency a puang a, mipuite chu inpumkhat taka awm turin a chah.

Building ṭhahnem tak chu an tlusawp a, kum 2010-a lirnghing rapthlak tak an tawrh vanga insiam rem chho mek hian chhiatna an tawk leh ta a ni. Kum 2010-a lirnghingah khan mi nuai hnih chuang an thi a, in tam tak tlusawpin, ei leh bar zawnna kawngah pawh a nghawng an la tuar reng a ni.