Israel PM-in US a tlawh dawn

Israel prime minister Naftali Bennett chuan kar leh hian US-ah zinin, US leh Israel ramte thawhdunna ṭha a awm zel theih nan US President Joe Biden chu August 26 hian White House-ah a hmu dawn.

"Prime Minister Bennett lo zin hian United States leh Israel inkara thawhdunna chu a tinghet dawn a, a lo zin tur hian ram pahnih sorkar leh mipuite inzawmna thuk tak neihte, United States ina Israel himna tura a inpekna pawh a tilang leh a ni," tiin White Houes press secretary Jen Psaki chuan a sawi.

Kumin January thlaa President Biden-an Donald Trump a thlak hnu khan US leh Israel inlaichinna nghet tak neih ṭhin khan ngai a awh chho lo deuh nia sawi a ni.

Hei vang hian Israel prime minister Bennett kaihhruai sorkar thar Trump-a thlawptu ṭha tak, Benjamin Netanyahu a thlak hnuah bul thar a ṭan leh dawn a ni.

Biden-an Iran nena nuclear deal an lo siam, Trump-a'n a inhnuhdawh san tawh chu tihnun thar leh a tum avangin US leh Israel inkar boruak hi a ṭha lutuk lo nia sawi a ni. Israel chuan Iran nuclear deal hi a dodal nasa hle.

Psaki chuan ram hruaitu pahnihte hian ramchhung leh khawvel himna tura pawimawh te leh Iran chungchangte an sawidun dawn a ni, a ti. "Israel PM lo zin tur hi ram pahnih hotuten Israel leh Palestine tana remna, venhimna leh boruak ṭha an neih theihna tur an sawidunna remchang tak leh, ramchhung himna tura hna an thawhdunna tur hun pawimawh tak a ni," a ti.