Covid-19 data titawp lailawk

Brazil health ministry chuan kar liam ta Zirtawpni khan an website-a Covid-19 chungchanga an ram dinhmun kimchang tarlanna chu mipui hmuh theih tawh lo turin a titawp lailawk.

Brazil-in website a tihtawp lailawk hi covid.saude.gov.br website tih a ni a, kar liam ta Zirtawpni khan a titawp lailawk a ni. A tuk Inrinni khan website hi an ti nung leh a, mahse Covid-19 vanga darkar 24 chhunga thite, kai thar leh enkawl damte chauh tarlan an ni tawh a ni. 

He tianga mipuite hriata Covid-19 data kimchang tarlan tawh loh a nih chhan hi, Brazil president Jair Bolsonaro leh an ram health ministry chuan hemi chungchangah hian thuchhuah engmah an nei lo a ni. Mahse Brazil hi khawvela Covid-19 hri kai tamna ber dawttu a ni mek a, hri kai an punchak em avang hian mi tam tak chuan an data hi a vaiin an chhuah hreh tawh niin an sawi a ni.

Kar liam ta Inrinni khan Brazil-ah hian hri kai thar mi 27,075 an awm a, thi hi Zirtawpni ni khan mi 904 an awm tih an website-ah hian an tarlang. Bolsonaro chuan an a twitter-ah heng date (information) te hian tuna an ram dinhmun a tih lan loh thu a sawi.

Brazilian Press Association hotu Paulo Jeronimo de Sousa chuan he hri beihna kawnga langtlang taka hmalak hi chakna a nih thu a sawi. 

Worldometers-in a tarlan danin, nimin thleng khan khawvel pumah Covid-19 kai hi mi 69,98,191 an awm tawh. Hri kai zinga mi 4,02,561 in an thihpui tawh a, enkawl dam mi 34,21,318 an awm tawh thung. 

US chu hri kai leh hri vanga thi tamna ber ram a ni chhunzawm zel a, hri kai hmuh tawh hi mi 19,88,545 an tling tawh a, mi 1,12,096 in an thihpui tawh a ni. 

Brazil chu hri kai tamna ram pahnihna a ni tawh a, mahse UK aiin hri thihpui hi an la tlem thung. Brazil-ah hian hri kai 6,76,494 awm tawhin mi 36,044 in an thihpui tawh a ni. 

Russia, Spain, UK, India, Italy, Peru, Germany leh Iran ramte chu hri kai tam zualna ram 10 ah an tel.