Sri Lanka-in mock poll buatsaih

Sri Lanka election commission chuan Covid-19 health guideline siam enchhin nan leh, July-August thla chhunga parliament inthlan an neih tur inbuatsaihna atan an ram chhim lama Galle district-ah mock poll a buatsaih. 

Parliament inthlan hi April 25 kha a neih hun tur a ni a, mahse Covid-19 leng vangin inthlan hun hi sawn a ni. A tirah chuan June 20-ah sawn a ni a, mahse an rama  hri lengin ziaawm lam a pan loh avangin sawn hlat nawn leh a ni. 

Sri Lanka-ah hian hri kai hmuh tawh hi mi 2,000 dawn an awm tawh a, mi 11 in an thihpui tawh bawk a ni. 

Mock poll neihna atan hian Galle district-a Ambalangoda polling division-a voter 200 vel thlan chhuah an ni. 

Election commission official Saman C Rat-nayake chuan hri leng karah inthlanpui hi buatsaih ni dawn ta se, sorkarin Covid-19 guideline a siamte a taka kenkawh a nih theihna atana lo inzir an duh tih a sawi. 

Mock poll neihnaa tel tura thlante hi kaihhruaina hi an inah pek vek an ni a, vote thlakna tur pen an keng a, face mask vuah tir vek an ni bawk. 

Parliament member 225 thlang tur hian vote nei mi maktaduai 16 chuang an awm a ni.