Isua phumna hmuna biak-in khar

Jerusalem-a Kristiante hmun pawimawh leh biakzina kalten an tlawh duh ber tak, Isua Krista phumna hmuna biak-in sak, Church of the Holy Sepulchre chu sorkarin chhiah lak dan tur policy leh property law siam thar a tum chungchangah lungawi loin kohhran hotuten an khar.

Sorkarin property law a siam thar turah hian kohhran ten tun hma lama private real estate firm hnena kohhran ram an lo hralh tawhte sorkarin a laksak phalna siam a ni. Kohhran hotute chuan he policy thar hi Kristiante beihna kawng khata an ngaih thu an sawi.

Roman Catholic, Greek Orthodox leh Armenian Church hruaitue chuan thuchhuah inṭawm siamin, hriattirna tihchhuah a nih leh hma chuan biak-in an khar rih dawn tih an sawi. Kohhran hruaitute chuan sorkarin dan siam thar a tum hmang chuan he biak-in awmna ram hi sorkarin a laksak an hlauthawng tih an sawi. Hetih lai hian bill siam tum thlawptu lam chuan he dan hi biak-in ram hlui, private developer hnena an hralha cheng Israel mi te humhalhna tur niin an sawi thung.

Kohhran hruaitute chuan Jerusalem hotute chuan Jerusalem municipality-in chhiah lak dan policy thar siam a, kohhran-ten khawpui chhunga sumdawnna hmun an neihte aṭanga chhiah lak an tum chu an sawisel bawk.

Jerusalem Mayor Nir Barkat chuan biak-in bik chu chhiah laknaah hian ngaihnathiam vek an ni a, mahse kohhran-in a thil neih–hotel, hall leh sumdawnna dangte erawhchu chhiah lak tur thar siam hian a huam tel dawn a ni, a ti. Kohhran-in sumdawnna hmun a neihte chhiah awl tir vek beiseina chu thil awm lo tak niin a sawi.

Israel cabinet chuan bill siam thar tur hi kohhranten an dodal avangin Pathiannia ngaihtuah a tum pawh a sawn hlat phah a ni. Kohhran hotute nen an buaina chinfel dan hi ngaihtuah an tum tih an sawi.