China President term pawhsei rawt

China-a rorellai, Communist Party chuan an ram president term kum nga chhung, a zawna term hnih bak chelh theih lohna dan siam chu tihbo a rawt.

Communist Party rawtna hi pawm a nih chuan President ṭanglai, Xi Jingping chuan president hna hi a la chelh chhunzawm leh thei dawn a ni. An dan hmanlai-ah chuan Xi Jinping hi kum 2023-ah president aṭanga a chawlh a ngai tawh dawn a ni.

Xi Jinping hi Moa Zedong hnua China ram hruaitu ropui berah a party congress chuan a ngai a ni. Kum 1953-a piang, Xi hi Communist Party dintu zinga mi fapa a ni a, kum 1974 khan party hi zawmin, 2013 khan president dinhmun a chelh thei a ni.

President a nih chhung hian China ram economic dinhmun a siamṭha nasa a, eirukna doin beihpui pawh a thlak nasa a, eiruknaa inhnamhnawih official tam tak man leh thubuai siamsak an ni tawh a ni.

President leh Vice-President term chelh theih zat bihthliah tihtawp rawtna hi nimin khan party Central Committee-in a ngaihtuah a, he rawtna hi China parliament National People's Congress-in a pawm ve leh a ngai dawn a ni. Annual meeting hi Marh 5 aṭangin neih ṭan a ni ang.