UNICEF-in DR Congo-a naupang thihna dem

Democratic Republic of the Congo (DRC) hmarchhak lama inbeihnaa mi 16 thihna thleng chu a dem thu  United Nations Children's Fund (UNICEF) chuan a sawi. He inbeihnaa thi zinga panga chu hmeichhia, kum 15 hnuai lam an ni. 

Mi 16 thihna hi June 3 a thleng daih tawh niin UN chuan a report-ah a tarlang a, DR Congo-a Ituri province hmuna Djugu area-a Moussa khuaa thil thleng a ni. Thite zinga a tam zawk hi tualchhung buaina avanga hmun danga tlanchhia a, an khaw  lama kir lehte an ni. Silai leh chem hmanga inbeihna thleng vang hian mi tam tak chu hmun dangah an tlanchhe zui leh nghal a ni. 

Ituri province-a Djugu, Mahagi leh Irumu area-ah hian tualchhung buaina avangin mi 2,00,000 chuang chu an chenna hmuna cheng ngam loin an tlanchhe tawh a ni. Ituri province-ah hian kum 2019, October 1 leh 2020, May 31 inkar khan civil mi 531 thah an ni a, heng zinga mi 375 chu kumin March thla hnu lama thite an ni tih DR Congo-a UN Joint Human Rights Office (UNJHRO) chuan a tarlang. 

DR Congo-ah hian chi leh chi inbeihna avangin tualchhung buaina hi vawi tam a lo chhuak tawh a, sipai leh pawl ṭhenkhatte inbeihna pawh a thleng fo bawk. Kumin April leh May thla chhung ringawt khan naupang pawngsual, thah leh ramtuileiloa siam case 100 chuang awm niin  UNICEF a tarlang bawk.