United State nena inbiakna tur kawng a inhawng : North Korea

South Korea-a Winter Olympics kharna inkhawm hmanga North Korea palai kalte hotu, Kim Yong Chal chuan US nena inbiakna turin kawng a inhawng reng niin a sawi.

Kim hian South Korea President Moon Jae-in top national security advisor Chung Eui-yong nena an inkawmnaah he thu hi a sawi niin SKorea Yonhap news agency chuan a tarlang. Kim hi NKorea-a rorellai, Workers' Party-a Central Committe vice chairman a ni a, Thawhṭanni khan Chung nen hian darkar hnih chhung meeting an nei a ni. Hemi hma, Pathianni khan President Moon leh NKorea palaite hi an inkawm bawk.

Thawhṭannia meeting an neihah hian Korea ram pahnihte chuan Korean Peninsula-a boruak ralmuang a awm theihna tura thawhdun zel an rel a, ram pahnihte inlaichinna pawh tihngheh an duh thu an sawi bawk niin Blue House chuan a tarlang.