Saudi-ah hmeichhiate sipaia ṭan phalsak

Saudi Arabia chuan a ṭum khatna atan hmeichhiate sipai an ṭan a phalsak.

Riyadh, Mecca, al-Qassim leh Medina province-ah hmeichhiate tan sipaia ṭan dilna hi thehluh phalsak an ni a, Ningani thleng thehluh theih a ni ang. Hmeichhiate hi indona hmunah chuan tirh an ni ve dawn lo a, mahse security force-ah an luh phalsak an ni ve tawh dawn a ni.

Sipaia ṭan tumte tana dan siamah hian Saudi citizen an ni ngei tura ni a, kum 25–35 inkar, high-school diploma nei chin tih a ni. Hmeichhiate leh anmahni enkawltu mipa, an pasal, pa leh nuṭa te chu province khatah an awm tura tih a ni bawk.

Saudi Arabia-ah hian sorkarin hmeichhiate dinhmun leh an dikna chanvo neihte chawikan tumin hma a la a, lal King Salman chuan Saudi Arabia rama hmeichhiate motor khalh khapna dan pawh a lo titawp tawh a, kumin June thla aṭangin motor khalh phalsak an ni dawn tih a sawi. Thla hmasa khan hmeichhiate sports stadium-ah football khel an en phalsak an lo ni tawh bawk. Sorkarin hma la mek mah se Saudi Arabia ramah mipate dah chungnunna chu a ngai reng niin human rights activist-te chuan an sawi. An system hman mekah chuan hmeichhia, puitling tawh pawhin zinchhuah, pasal neih leh lenchhuah dawn pawhin an chhungkuaa mipate phalna an lak phawt a ngai a, hna an thawh dawn pawhin an remtihpuina an neih tel a ngai a ni.