Sipaite chetdan dodal turin Suu Kyi-i phut

Nobel Peace Prize chawimawina lo dawng tawh, Tawakkol Karman-i chuan Rohingya civil mite chunga Myanmar sipaite chet dan chu lo dang a, dodal turin Myanmar hruaitu Aung San Suu Kyi-i chu a phut tih a sawi a, a dang thei lo a nih chuan a bang mai tur a ni, a ti.

Right groups leh United Nations investigor-te chuan Myanmar sipaiten beihpui an thlaknaah civil mite chungah mipat hmeichhiat lama pawikhawihna, inthah leh an khua thlenga halsakte a thleng nasa niin an sawi. Mahse kum 1991-a Nobel Peace Prize lo dawng tawh, Suu Kyi-i hian an Rohingya mite chunga sipaite chetdan a demna thu hi a sawichhuak lo a ni.

Thawhṭanni khan Karman-i leh Nobel laureate dang pahnih chuan Bangladesh-a Rohingya refugee-te awmna camp an tlawh a, Suu Kyi-i awm dana an lungawi loh thu an sawi. Karman-i chuan Suu Kyi chu thudik tak a puangchhuak thei lo a nih chuan a bang mai tur a ni tiin, sipaite chetdan chungchangah a ngawi chhunzawm zel a nih chuan pawikhawihtu zingah a tel ve tihna a ni ang, a ti.

Karman-i hian kum 2011 khan Ymeen rama a hnathawh ṭhat avangin Nobel Peace Prize hi midang nen an indawn ṭawm a ni. Suu Kyi-i chu civil mite a venhim zo loh avangin sipai officer-te rualin thubuai pawh a hmachhawn ve a ngai a ni, tiin a sawi.