Taliban-ten NATO leh sorkar hmasa tana thawktute an dap
Afghanistan-a roreltu thar, Taliban-te chuan sorkar thuneihna an chan hnuah phuba an la dawn lo tih tiam mah se, firfiak pawlte hian sorkar hmasa leh NATO sipaite tana lo thawk tawhte an dap mek niin UN document chuan a tarlang.
Taliban firfiakte hian inah kal kualin, an mi duhte hi an zawng mek a, an chhungte thlengin a vau nia sawi a ni bawk.
UN hnena intelligence report petu, RHIPTO Norwegian Center for Global Analyses-in report a pekah hemi chungchang hi tarlan a ni. An pawl hotu Christian Nellemann chuan Taliban-ten an zawn mekte hi an inpek loh chuan an chhungte chu manin hremna pawh an pe ngei dawn niin a sawi. Taliban blacklist-a awmte dinhmun chu a him lo hle a, mi tam tak tihhlum an ni thei dawn niin a sawi.
Hetih lai hian ram hrang hrangte chuan Afghanistan aṭang hian an mi leh sate an lachhuak chhunzawm zel a, NATO official chuan ni nga liam ta chhung khan Kabul Airport aṭangin mi 18,000 chuang chu phurh chhuah an ni tawh niin a tarlang a, nimin khan mi 6,000 vel hruai chhuah leh tum a ni a, an zingah hian ram dang sipaiten ṭawng lettu atana an chhawr ṭhin, Afghan mi eng emaw zawt an tel.
Facebook-in Afghan user-te account venhimna tur siam
Facebook chuan Afghanistan-a Facebook hmangtute himna turin safety measure thar a duang tih a sawi.
Firfiakten Aghan mi Facebook hmangtute an chhui zui theihna turin, Afghanistan bikah hian Facebook account-a 'Friends' list enna leh search-na chu an tibo tih an sawi. Networking site Linkedln pawhin Afghanistan rama connection neite list chu thup tumin hma a la mek bawk.
Taliban-te hian social media hmangin anmahni dodaltute zawn chhuah an tum hlauhthawnna a lian a, hei vang hian account neitute himna turin hma a la thar ve nghal tih Facebook head of security profile, Nathaniel Gleicher chuan a sawi.
Gleicher chuan Afghanistan-a chengte tan vawi khat click-a an account lock nghalna tur an siam thar a,an profile hi an lock chuan an friend-te tih loh chuan a thlalak leh timeline-a an post an hmu thei dawn lo a ni. Instagram-ah pawh an account venhim dan tur 'pop-up alert' an siam tih a sawi bawk.
Donald Trump-a'n Ashraf Ghani sawisel
US President hlui Donald Trump chuan Taliban-ten Kabul khawpui an luh veleha an ram tlanchhuahsantu, Afghanistan president Ashraf Ghani chu na taka sawiselin, a lakah hian rinna a nghah ngam tak tak ngai loh thu a sawi.
Donald Trump chuan, Ghani chu mi bumhmang nia a ngaih thu sawiin, an senator-te a lama ṭan tir tuma an rilru hneh tuma an beih reng thu a sawi. Kabul a chhuahsan khan sum tam tham tak a tlanchhuahpui nia an sawi pawh chu a dik mai theih thu a sawi bawk.
Mi mtd 12.2 te chhawmdawl ngai
United Nations chuan Afghanistan tualchhung boruak ṭha lo thleng mek karah, chhawmawl hna kalpui mek pawhin tlakhniam lam a pan tih a sawi. Mi maktaduai 12.2 vel chu ei leh in lamah dinhmun ngaihtuahawm takin, chhawmdawl ngaiin an awm mek a ni, a ti.
Taliban-ten thuneihna an chan hnuah mi sang telin Afghanistan an chhuahsan tawh a, tlanchhuah tum pawh an la awm mek bawk. Hetih lai hian kumin chhungin Iran, Pakistan leh ram dang aṭangin Afghan mi 7,35,000 vel chu an ramah hian an kir a, heng mite hi chhawmdawl ngaiin an awm mek a, kumtir aṭang khan mi 5,50,000 vel chu tualchhung buaina avangin ram chhung hmun dangah an tlanchhe bawk tih a sawi.